السلام عليكم
من أيام فاتو سمعنا أن ليبيا بتصدر ورقة نقدية جديدة بقيمة 50 دينار وفعلا صدرت الورقة هده في اليومين اللي فاتو بس بصراحة صدورها خلق هلبة علامات إستفهام على حالة ألاقتصاد الليبي والسوق الليبية ... يعني حسب ما أنا فاهم أن التضخم الاقتصادي هوا أهم ألاسباب في أصدار أوراق نقدية زي هده بالليبي لما يبدى معاش فيه قيمة للعملة المحلية
خاصة بعد أرتفاع أسعار العقارات والاراضي وعدم وجود بديل للمواطن بعد حالات ألهدم اللي صارت واللي قاعدة تصير لحد ألان وأيضا إرتفاع أسعار النفط واللي ساهمت بشكل كبير في إرتفاع أسعار باقي المنتجات الاستهلاكية للمواطن الحاجات هده كلها هيا السبب في جعل النقد اللي في السوق الليبية أكبر من قيمة التداول فيه والسبب في تدني قيمة العملة الليبية مقابل باقي العملات الاجنبية ,والسوال هني من المستفيد ومن المتضرر منها ..؟؟؟ المتضرر منها أكيد المواطن العادي صاحب الدخل التابت والمحدود وأيضا المدخرين لي أوصول مالية وبينما أنك اتشوف ألابتسامه من الودن للودن زي منقولو بالليبي على وجوه أصحاب الاذخرات العقارية وأصحاب الاذخرات الثانية زي الذهب والفضة والاحجار الكريمة يعني لو في حد فيكم عنده قرشين يمشي يشري بيهم حاجة خير واهم اضرار حالات الاقتصاد اللي زي هده زيادة في البطالة و إنخفاض في مستوى المعيشة وإعادة ترتيب طبقات المجتمع
والسؤال المهم والضروري معرفة الأجابة عليه هل أمانة او وزارة الاقتصاد الليبية ماشية بخطة من اجل تحسين الوضع الاقتصادي وتحسين الحالة الاقتصادية للمواطن الليبي؟؟؟؟؟
إن شاء الله من عند ربي خير
4 comments:
Beautiful Blog!
Hug Invólucro
http://blogdoinvolucro.blogspot.com/
السلام عليكم،
رمضان كريم وكل عام وأنت بخير،
الله يكون في عوننا من قصة ارتفاع الأسعار وانشالله تكون فيه خطة قيد الدراسة لتحسين الوضع الاقتصادي،
سلام
ياودي يشدوا ورقة ال50 بعيد عليا ويريحولي راسي
اصلا كل الدول العربية بدت تشكي من غلاء الاسعار وكل شيء مضاعف مضروب في 2
وزي ماكان يدعي بوي الله يرحمه بندعي حتي اني
ان شاء الله مايحضرنا محاضر سوء
سؤال فى مكانة والله
من وجهة نظري ان هدا اعتراف من الدولة ان التظخم موجود و هدا شىء مش كويس للمواطن العادي و فى الوقت هدا منوا هدا معندي منقول إلا ربي ايكون فى عون العائلات و الناس
فى امان الله
Post a Comment