هم يقهر يا ليبيا

السلام عليكم

اليوم وأنا نتصفح في المواقع الاخبارية اللي تخص ليبيا وأخبار ليبيا لقيت تقرير أستفزني وقهرني لحد كبير وأنا متأكد انه رح يستفز أي ليبي أو ليبية خاصة بعد المبالغ والأرقام الفلكية اللي نسمعو فيها تنهب وتصرف وتعطى هداية أو لشراء رضى بنت الرايس والكومبانية متاعها !! والله شيئ يقهر ويبكي ويبغدد ويركب السكر والضغط والله هم مش عارف لأي حد بنوصلو في ليبيا من فقر وأهمال وتحقير للأنسان والمواطن؟؟ من يومين فاتو شوفنا قيمة الأسثمارات الليبية الخارجية واللي وصلت لترليون دولار "1000 مليار" وكيف قاعدين يتباهو بيها بكل فخر واللي الله أعلم شنو قعد منهم بعد الأزمة اللي صايرة في العالم وقبلها بأيام شوفنا الملايين اللي تم نهبها تحت غطاء رابطة مواليد الفاتح واللي تفاجئنا بعد يومين بتصريح لأمين الرابطة بأن الرابطة مستمرة لا وزاد قال أن الرابطة بتتوسع لخارج ليبيا وبتفتح فروع ليها في أيطاليا وأكثر من دولة ثانية بعد ماتوقعنا أن نشاط الرابطة بيتجمد وبنفتح تحقيق كبير لكن لا مازال باش تكمل ويبدى النهب بالمليارات لأن الملايين والأرقام الصغيرة هده معاش تملا عينهم ربي ايصبرنا وخلاص للأسف مكتوب على ليبيا أن خيرها يمشي لغيرها

........................................

التقرير في صحيفة بوابة ليبيا للدكتور فرج نجم بعنوان لكم الله يا أبناء رفاق المختار

التقرير يتكلم على ماساة يعيشها أولاد وأحفاد ناس دفعت النفيس والغالي في سبيل الله والوطن ناس ليها تاريخ كبير في الجهاد, في منطقة معروفة بالجبل الأخضر واللي شبهها صاحب التقرير بأفقر أحياء مقديشو بالصومال لكن على دولة غنية شيئ مستحيل تفكرو فيه بالله من يتوقع أن مازال في عائلات ليبية ساكنة في "براريك زينقو" !! والله شيئ يقهر ويحشم عائلات ليها تاريخ عايشيين في أماكن لا تصلح حتى لتربية الحيوانات حتى هناقر الدجاج ليها شروط أفضل من هكي والله ماتعرف شنو تقول بكل قلة فلوس والأ قلة أراضي؟؟؟؟ شوفو التقرير بنفسكم وأحكمو وهده بعض صور منه واللي كان بتاريخ 20-10-2008

تقدرو تشوفو بنفسكم التقرير

إن شاء الله من عند ربي خير

فرهود وحسن لقطع

السلام عليكم

اليوم بنكسر وحدة من القواعد اللي ديرتها لروحي يوم ما فكرت نفتح مدونة واللي هيا أني نتكلم على روحي وبنحكيلكم على موقف أو حاجة صارت معاي..., طبعا في الاول كلكم أستغرب منو فرهود هذا وشنو علاقته بحسن لقطع واللي حتى هوا أغلبكم ميعرفاش أذا مكانش كلكم عموما أنا عن نفسي نعرف فرهود أما حسن لقطع تعرفت عليه من أيام فاتو بس رغم أنه متوفي من الــ1952
بالنسبة لفرهود ,,أسمه الحاج عمران وهو شيباني كبير في السن من يوم فتحت عيوني في الدنيا وأنا نعرفه لأنه ساكن في نفس المنطقة أللي أنا ساكن فيها عمره تقريبا في السبعينات أواخر الستينات الله أعلم بالضبط وأللي معروف عليه أنه واحد كافوردي كبير ومشكلجي لأبعد حد ومفيش حاجة في المنطقة تفوته قريب حتى إيقولك شنو حلمت البارح وربي رازقه أربعة أولاد حاشاكم حتى هما مفيهمش واحد تقوي بيه قلبك أللي متاع دوخة وأللي نصاب وأللي خانب يعني ميفرقوش على بوهم هلبة والحاج عمران هذا ديما بمغامرته مع أهل المنطقة وحتى البرانية مش مخليهم في حالهم وفي كل سلاطة غاطس في عزي حاشاكم في عرس في طهور في مولود في تاليف وديما بمشاكله لدرجة إن أللي يعرفه مرة أو ايصيرله معاه موقف يبدى ديما ايتبع في أخباره وينشد شنوا خر مغامرات فرهود ونذكر ديما لما كنا صغار انديرو معاه في مشاكل لأنه ديما ياخد منا في الكورة ويمزق فيها لما نلعبو ومن هنى جى أسم فرهود والمشكلة إن كل أهل المنطقة مش عارفين ملته من وين مرة تسمع إيقولو غرياني مرة خمسي مرة طرابلسي مرة ورفلي وفي اللي إيقول أصله من درنة و أللي أيقول الكفرة وفي ناس قالو مش ليبي أصلاً!! لين صبح رمز في المنطقة لكن واكل على قلوب أهل المنطقة وشارب والكل عندهم معاه ذكريات لأنه مستحيل يعطيك حقك ولو عطهولك معنها يبي منك حاجة أو ناويلك على حاجة ومارين عليه أجيال من أهل المنطقة وهوا قاعد مكبش في الدنيا بأيديه وسنونه ومرات أهله المنطقة ايبصرو عليه ايقولوه "شنو يا حاج عمران مازال ربي مش واخد أمانته " إيقوللهم مازال لين انسقدكم قبلي أنسان مليشي حل بكل شخصية أسطورية لو تاخد شوية شهرة مش رح ينساها التاريخ زيه زي قارقوش وجحى والناس هادو ومن مدة أهل المنطقة يأسو منه ومن أن حاله يتصلح وصارو ايتبعو في أخباره من باب الطرافه وقاعدين إيعدوله في الأيام اللي باقية من عمره وخلاص
أما بالنسبة لحسن لقطع هذا شاعر شعبي ليبي عاش في النص الأول من القرن العشرين من مواليد اجدابيا واللي عاش كل حياته فيها ما بين 1872 و 1952م أسمه حسن الفاخري مشهور بالقطع لأنه كان فاقد لاصبعين من ايديه الايمين البنصر والسبابة والمعروف عليه انه أنسان أمي لكن ذكي وسريع البديهة وفطحل من فطاحلة الشعر اللي كان صنعته الوحيدة وكان في الهجاء مفيش خوه بين العرب في الفترة اللي عاشها ولو حطك في راسه ربي يصبرك وخلاص وتزوج شاعرنا ثلاثة مرات لكن ربي مرزقاش ذرية
أما شنو الموقف وعلاقة الحاج عمران وحسن القطع بيه رغم أن الأول مازال عايش والثاني متوفي من أكثر من نص قرن هيا أني كنت من أيام فاتو قاعد في البيت قدام الكمبيوتر انقوقل تقعميزة كساد يعني وعندي مجموعة أغاني في الجهاز فاتحهم اندندن معهم وكل مرة تجي أغنية شكل وأنا قاعد جيت أغنية لأحمد فكرون أسمها سلف مردود كان تسجيلها مش واضح هلبه قعدت اندندن معها ومسترسل في اللي اندير فيه لين جى في ودني بيتين منها واللي هما
المسلم لا طق الستين .. يتوب وكان بخيل يجود
وهو وين أشرف ع السبعين.. قدع ردّ مع الجهل اردود
طبعاً انا سمعتهم وفي نفس اللحظة جت صورة فرهود أوالحاج عمران قدامي وقعدت ساعة نضحك كأن اللي كاتب الأغنية يعرف الحاج عمران أو كاتبها فيه سبحان الله وطبعاً الشيئ هذا خلاني انفوت المواضيع اللي كنت انقوقل عليها وقعدت نبحث على كلمات الاغنية هده واللي كاتبها وبالطريقة هده تعرفت على شاعرنا حسن لقطع يعني في اخر الامر الحاج عمران متاع المشاكل طلعت منه بفايدة ...


هده الأغنية وكلماتها بالك يطلع فيه في حياتكم فرهود حتى أنتم

سلف كيف الصاع المنقود..سلف مردود..سلف فيه اقصاد ومقصود
سلف جاني من غنّايين..سلف لاقيته دون الرود
عرب بالشينه منغومين ..فلان فلان النود النود
عرمرم حسّاد عنيدين.. لهم من ميلود لميلود
عرب ياناري منقرضين .. مغير جواجي تحت اجرود
اجعنهم فحمة كوم عوين.. اجعن باب غناهم مسدود
اجعنهم قدّام الحيين.. قليلين الزرع وهبّود
كما اللي حرّك لغم المين..وم الساعة تكّ البارود
كبايا ردّوا مكسورين.. كما طايح عظمه مقنود
اتدقديق قران موازين.. جفل حاشيهن يوم ورود
كم اللي عند الموّالين.. ورد بالنقضة يوم عمود
أربع ما يدور الصفـّـارين.. شهر ف اللي قبل الميلود
علي بوفلاّقة مسكين ..نطق لا ناشد ولا منشود
بحث بحثة تيس المسكين.. اللي فيه الجزّار يقود
خصوصا ليّاَ كان قرين..مغير رقادة ريح وهود
المسلم لا طق الستين .. يتوب وكان بخيل يجود
وهو وين أشرف ع السبعين.. قدع ردّ مع الجهل اردود
لنوّار الشيب تسودين ..تقول يغرّي في كرمود
ويركب ف اشنابه تدهين ...ويطلاهن نغج وبارود
ومحرمته فيها هاذين..دبش واتي ديما مجبود
ثلاث مكاحل ومراتين ..ومرود عاج ومرود عود
يغوّص في كل كوازين..يجي قايد ويجي مقيود
وينشد ع الهجّالة وين .. اللي متبع واللي جلمود
لبكرة مسّع دار خزين .. كمل عمره تسويف كنود
يصبّي بين الصفــّـاقين.. وزايد ع الصف بعلـّـود
يقول لبو دور عراجين .. جضارى جالن ع المقصود
خذا منّي هالجرانين.. عطاه الله بغير حسود
غبا يقعد قرنين سنين..وهو مرفود..كما منهل جا تحت اغرود

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

الرود: اشارة الي نوع من الالعاب الرياضية التي كانت تتم في البادية وقت الربيع وهي لعبة الجليد الان التي يتقاذفها اللاعبون بالعصي وكل فريق يحاول قذفها ناحية الاخر وعندما تصل الكرة ناحية الخصم تسجل اصابة وتسمى رود
النود: الشخص التافه
عرمرم : جهال
موازين: جمع (موازنه) وهو وعاء كبير من الزجاج كان مستعملا لفظ الماء
يوم عمود: تسمى الايام الثلاثة من الاخيرة من الخريف ايام العمود والبادية لايوردون ابلهم الماء في هذه الأيام لان ذلك ضار حسب تجاربهم
اربع مايدور: هو يوم الاربعاء الاخير من شهر صفر ويتشاءم البدو السفر فيه

الراب الليبي الخراب الليبي ..!!!؟

السلام عليكم

موضوعي مش على الهدم والتكسير اللي في البلاد الخراب هدا طلع ساهل حله شوية فلوس وسنتين بالكثير يتعمر كله, موضوعي يتكلم على خراب من نوع ثاني واللي لو زاد أو استمر نبو مش اقل من 15 السنة باش انصلحوه من جديد لان الخراب هدا ضارب شبابنا والشباب الصغير في العمر وحطو خطين تحت كلمة صغير لان اغلبهم مابين مواليد 87 و 94 فايروس حاشا السامعين أسمه " الراب الليبي" واللي المفروض كان يسموه الخراب الليبي على الأقل أسم فيه شوية واقعية

تحذير هذا الفيديو يحتوي على الفاظ تخدش الحياء والذوق العام

أغاني قمة في الانحطاط وكلام تتحشم أتقوله بينك وبين نفسك مصطلحات شوارع سلاطة !! روينة !! متعرفش شنو أتسميها ؟؟ والمشكلة أنك تلقاها في كل التلفونات وفي النت وتسمعها في الشارع يعني الموضوع زاد على الحد, أول مرة سمعت فيها أغنية راب ليبية ممكن كانت من ثلاثة سنين فاتو ومعطيتش أهمية للموضوع لاني توقعت أيصير زى ماصار في السبعينات والثمانينات لما فكرون والمزداوي والشاعري والحسناوي ومحسن بيت المال وغيرهم خذو الموسيقى الغربية وزادو عليها الثقافة والأفكار العربية وطلعو بنوع جديد من الفن يتماشا مع متطلبات الشباب في هذكا الوقت واللي فعلا خلو بصماتهم في أغاني بجد جميلة وليها معاني وأهداف كبيرة زى يا بلادي ولبنان وشوارع المدينة والغربة وحلوة الصورة وشباكك وقولولي وين دياره وليل السهرانين وهلبة غيرها بس الباين أن الفرق في التعليم والثقافة اللي انعدمت في وقتنا هدا هو السبب في التخلف هدا وهو السبب في العقم الثقافي اللي خلا الشباب هادو ياخدو الراب " كوبي باست" من غير حتى ما يحاولو ايغيرو فيه شوية, وحتى جو العصابات أو القانقستا زي ميحبو ايقولو مدايرينه يعني بدل من انقدمو خطوة وخرنا خمسين خطوة

تحذير هذا الفيديو يحتوي على الفاظ تخدش الحياء والذوق العام

مش عارف كيف وصلنا للمستوى الرهيب هدا من الحقارة في الذوق العام ؟؟وبعتالي مش المفروض في حاجة أسمها رقابة وين وزارة الثقافة ووين الإعلام ولا غير فالحين في أتهام الناس اللي طالبت بفتح تحقيق في القصة اللي صارت للشاب الليبي في مصر بأنهم ايسببو في الفتنة بين الأشقاء ويفرقو في اللحمة العربية يا والله هم وخلاص!!؟

خلوني في خرافتنا توا مش الناس هده تسجل في أغانيها هده في استوديوهات يعني ساهل انديرو عليها كنترول وألا وصلنا لحد من الحرية والترف لين كل حد عنده أستوديو في بيته ويسجل ويسّوق شنو يبي ؟؟؟

تحذير هذا الفيديو يحتوي على الفاظ تخدش الحياء والذوق العام

Queener & Double Zero & Wrong Way & Center Boys & 6-5 & G.A.B & DR.MAC & GANGSTA B & THE ELF & Brown Sugar & GB

أسماء غريبة هلبة تخليك تستغرب امتى طلعو هادو بس ؟؟؟ وعلى هدا الحال الفانانين الثانيين المفروض معاش يشكو من شيئ مدام الامور ساهلة للدرجة هده واللي ايجي يغني !!! والله المفروض الناس هده تتقدم للمحاكة على أغانيها اللي تخدش الدوق العام وصدقوني لو صار أي أجراء قانوني لواحد بس حيكون رادع للفرق الثانية ولأي حد أيفكر أيدير حاجة زي هده, لا ونزيدكم من الشعر بيت أن وحدة من أكبر المؤسسات الوطنية العريقة اللي ليها تأثير كبير على الشباب وليها تاريخ في النضال السياسي من أجل توحيد واستقلال ليبيا واللي من مؤسسيها بشير السعداوي ومنصور كعبار ومعروف انها ديما سباقة في تكريم أسماء ليها باع طويل في الفن والثقافة في ليبيا أمثال علي مصطفى المصراتي وكاظم ناديم ومختار الاسود وسلام قدري وغيرهم واللي هيا "نادي الاتحاد الرياضي الثقافي الاجتماعي" قدمت دعم لوحدة من الفرق هده باش ادير اغنية للنادي وقاعدة اتجيب في كل مبارة اربعة والا خمسة مهرجين حاشاكم وينقزو ويهرجو في الملعب وأنت تتفرج على المبارة مع بوك والا خوك وتدعي أن شاء الله غير ربي يستر وميطيحش سروال واحد من منهم وتبدى الحكاية نقل مباشر والمصيبة انهم لا طعم ولا لون ولا رائحة ويعكرو ماء الجير الرائق على قول أبلة الكيمياء متاع زمان والله شيئ أيحشم

إن شاء الله ربي يهدي وخلاص أنا ترددت هلبة قبل منكتب الموضوع هذا خوفت من أني ممكن لو نتكلم على الموضوع أنزيد انديرلهم دعاية أو تكون بمتابة الاعتراف بيهم لكن والله معاد قدرت لأن القصة في زيادة ولابدة منديرولها حل وسامحوني لو أني حطيت حاجة أقل من المستوى أو خليتكم تسمعو كلام ممكن أغلبكم وجهه أحمر لما سمعه لكن كل الغرض أنكم تشوفو حجم الماساة اللي وصلناها

وإن شاء الله من عند ربي خير

لا حول ولا قوة الا بالله

السلام عليكم

اليوم وصلني الفيديو هذا من صديق فيه مأساة صارت أيام العيد والله أعلم ... لسقوط ووفاة طفل من على جسر وادي الكوف والله منظر ايقطع القلب إن شاء الله ربي يتقبله في رحمته والباين ان عمر الطفل مش أكثر من 13 السنة فقد توازنه وهو يلهو ويستعرض في مكان قمة في الخطر وبطريقة أغبى من الغباء

إن شاء الله ربي يتقبل الطفل في رحمته وإن شاء الله ايصبر أهله والواحد من الموقف ميقدرش إيقول شيئ وميعرفش كيف ايعبر غير بلا اله الا الله وإن لله وإن اليه راجعون بس مش عارف المرة هده على منو بنحطو اللوم...؟؟؟ حني متعودين على شماعت الحكومة والدولة الليبية ومسؤلينا اللي انعلقو عليها في كل مشاكلنا وتخلفنا بس المرة هده الموضوع اخلاقي تربوي

وين العيلة وين ألاب وألام وين العم والخال وين الجار والمدرس وشيخ الجامع والناس اللي كانت تربي ؟؟ قبل لما كنا صغار كان الكل ايربي وين ماتمشي تلقى اللي ايوجهك ويفنص فيك ولو ديرت عملة وتسحاب روحك انجيت بيها أول ماتوصل للحوش تلقها سابقاتك رغم اني مش كبير هلبة في العمر لكن عشتها الحاجة هده , وقصة الاستعراض والعناد على وادي الكوف مش جديدة و الناس كلها شايفينها من قبل لكن الباين مفيش حد فكر ايديرلها حل الله غالب حنى الحاجة منفيقولهاش لين تسبب كارثا

إن شاء الله ربي يرحم الطفل هدا ويصبر أهله و يهدي أولادنا ويهدينا أجمعين وياريث الناس اللي قراب من الجسر ايديروله حل وينهو الظاهرة المرعبة هده وتقريبا الحكاية مش مكلفة شكارتين شامنت ومرش او قزاز مكسر من الجهات الاربعة للجسر تنهي الموضوع هدا نهائي

وأن شاء الله من عند ربي خير

العقبة لداير

السلام عليكم أن شاء الله عيدكم مبارك وأن شاء الله بالخير والصحة وراحة البال والعافية عليكم وأن شاء الله ديما ملتمين على الخير والفرح والود شيابنين وعزايز وأباء وأمهات وأولاد وبنات وصغار وكبار الكل فرحنيين وكل البيوت مفتوحة للكل وين ماتمشي تلقى اللي ايرحب اللي ايبارك واللي يدعي بالخير بسم الله مشاء الله

أن شاء الله ربي ايزيدكم عز ويطول في عمر شيابينا وعزايزنا وأبائنا وأمهاتنا ويفرحنا بأولادنا وبناتنا وأنشاء الله ربي يجعل صغارنا هما عمارنا وكل عام وأنت بألف خير

إصفعني وخد دينارا ..!!!!!؟

السلام عليكم

ممكن كان ألاحسن لو قلت أصفعني وخذ أستثمارات بقيمة 10 مليار دولار وتعالى زييط في بلادي ودير ماتبي وعلم أولادي الغش والكذب وأفتحلهم أسواق للحشيش والمخدرات وأفتحلهم أسواق للدعارة و"مولى البيت يتفرج عليك والبسمة على وجهه" ومفيش من أيحاسبك ولا أيقولك نص المية قداش

لا وأنزيدك فوق هذا سيارات لمواليد الفاتح 69 عندك لا واخرها 5 مليون مساعدات فورية وتبرع بمدينة سكنية أكيد عرفتو اني نتكلم على العلاقات الليبية المصرية

مشاء الله مشاء الله الخير واجد ومانقصنا شيئ بكل ماغير شوية مستشفيات وشوية مساكن للشباب وشوية مدارس وشوية جامعات وبنيه تحتية بسيطة مابين طرق وخطوط هواتف وكهرباء وصرف صحي وفرص عمل للناس وكله ساهل ومفيشي مشكلة بعتالي منو يجري في جرتنا أصلا بالشوية علينا مازاااااااااااااااااال الوقت قدامنا

وشنو صار يعني لو شبابنا تزوجو في سن كبير شوية بالعكس الزواج في سن متأخر ليه هلبة منافع أولا ايكونو ناضجين أكثر ثانيا ايجيبو أقل عدد من ألاطفال يعني بدل ما كل عائلة عندها 5 او 4 أطفال سادهم عيل وألا أثنين, شنو بنكلبو حني ؟؟؟ سادين خمسة مليون بعثالي ليبيا صغيرة هلبة وضيقة هلبة وحتى الزحمة هلبة مش كويسة خلي توا انبيضو وجوهنا مع الجيران ومع ألاحباب وألاصحاب والناس اللي تقدر في المعروف على ألاقل نسمعو منهم في كلمة شكر

سبحان الله كأن هدا لسان حال المسؤلين في ليبيا ولسان حال الحكومة الليبية

اخخخخخخخخخ وخلاص بالله شنو اللي أستفاده الشعب الليبي أو المواطن الليبي من هدا كله أو شنو اللي أستفاداته الحكومة الليبية أصلا بالله عمركم قريتو خبر فيه شكر من أحد المسؤولين المصريين أو حتى من صحفي مصري في أي صحيفة مصرية

بالعكس تماما كل يوم انشوفو حاجات نتعجبو منها !!!!! ابدها بتجميد أحد المحاكم المصرية لأموال ليبية واخرها مقتل الشاب الليبي وتكسير سيارته بكل غيظ وحقد وهمجية من المصريين في الشارع بعد حادث مرور قضاء وقذر هدا من غير الدراما اللي دروها بعد خسارتهم قدام المنتخب اللي في الدورة العربية للخماسيات لما قالو الليبيين ضربونا باش نخسرو البطولة قدامهم وبعد الدرما اللي دروها بعد أغراق خفر السواحل الليبي لمركب صيد مصري متسلل داخل المياه الليبية وقالو عليه مركب صيد مسالم والله يا ناس لو تعرفو قداش محاول تهريب حشيش ومخدرارت اتم في كل عام من الحدود المصرية سواء كانت من البر أو البحر شوفو الفيديو هدا واحكمو بأنفسكم أذا كان خفر السواحل الليبي عندهم حق وألا لا

هذا من غير حالات الغش والسرقات وألاعتداءات وكل شيئ موجود في اليوتيوب ومع هذا ليبيا مازالة فاتحة بابها لأكثر من 2 مليون مصري لو نضربوهم في الاربعة يعني كل مصري يشتغل في ليبيا ليه عائلة من ثلاثة أشخاص بالاضافة ليه هوا يطلع العدد 8 مليون مصري يعني 8 مليون مصري عايشيين من خير ليبيا هذا من غير الحاجات اللي تكلمنا عليها في أول الموضوع لكن للأسف ألاشقاء المصريين "يأكلو في الغلة ويسبو في الملة

شوفو مثال بسيط على أسلوب النخبة المتعلمة في مصر وشنو أتقول على ليبيا هذا أحد المدونين أللي عندهم صيت كبير في مصر وأللي اينادو من أجل ألاصلاح في مصر أسم المدونة متاعه الوعي المصري

واللي للأسف مشوفتش أي رد على كلامه وأسلوبه الحاقد هذا في أي مدونة من مدونات الليبيين اللي راقدين في العسل وكل مدوناتهم خواطر ويوميات أسخف من السخف كأن كل همهم تزين مدوناتهم بالصور الجميلة وشعارات القومية العربية وتحرير فلسطين والعراق يا ناس ميحكش جلد زي ظفرك, وحتى مدونات الليبين اللي في المهجر واللي مفروض يقدرو يكتبو شنو يبو من غير رقيب أو حسيب قاعدين يتباهو بعدد السنين اللي عاشوها خارج ليبيا ويهدرزو على مغامراتهم في بلاد الفرنجا

وفرحت لما شوفت مدونة من مدونات مكتوب أسمها ليبيون من أجل البحث عن العدالة متناولين فيها موضوع الشاب الليبي بطريقة حلوة وأسلوب حلو ومدايرين عريضة تضامن للحكومة الليبية من أجل فتح تحقيق في الحادث من غير سب أو شتم أو تجريح لأي حد

وبالله بالمرة ديرو مقارنة بسيط للأسلوب وطريقة تناول المواضيع بين حادثة أغرق القارب المصري في مدونة الوعي المصري اللي ما شوفتله وعي وحادثة قتل الشاب الليبي وتحطيم سيارته في مصر في مدونة ليبيون من أجل البحث عن العدالة

يا ناس أنا مش حاقد على مصر أو المصريين واللوم مش عليهم في النهاية كل حد ايدور في صلاح بلاده زي منقولو بالليبي أنا لومي على مسؤلينا الكرام وحكومتنا الجليلة اللي قاعدين ايبندقو ويضربو على صدورهم ومخلين بلادهم خاربة ومخليين ناسهم عايشين في الخراب والله حرام عليهم ربي مقالش بيه هذا وجحى اولى بلحم ثوره أعطو الناس حقها قبل بعتالي كلنا معاكم لمساعدة أي دولة شقيقة أو صديقة تحتاج لمساعدة

أن شاء الله من عند ربي خير

الــــــــى اين ...........؟؟؟

السلام عليكم

من أيام فاتو سمعنا أن ليبيا بتصدر ورقة نقدية جديدة بقيمة 50 دينار وفعلا صدرت الورقة هده في اليومين اللي فاتو بس بصراحة صدورها خلق هلبة علامات إستفهام على حالة ألاقتصاد الليبي والسوق الليبية ... يعني حسب ما أنا فاهم أن التضخم الاقتصادي هوا أهم ألاسباب في أصدار أوراق نقدية زي هده بالليبي لما يبدى معاش فيه قيمة للعملة المحلية

خاصة بعد أرتفاع أسعار العقارات والاراضي وعدم وجود بديل للمواطن بعد حالات ألهدم اللي صارت واللي قاعدة تصير لحد ألان وأيضا إرتفاع أسعار النفط واللي ساهمت بشكل كبير في إرتفاع أسعار باقي المنتجات الاستهلاكية للمواطن الحاجات هده كلها هيا السبب في جعل النقد اللي في السوق الليبية أكبر من قيمة التداول فيه والسبب في تدني قيمة العملة الليبية مقابل باقي العملات الاجنبية ,والسوال هني من المستفيد ومن المتضرر منها ..؟؟؟ المتضرر منها أكيد المواطن العادي صاحب الدخل التابت والمحدود وأيضا المدخرين لي أوصول مالية وبينما أنك اتشوف ألابتسامه من الودن للودن زي منقولو بالليبي على وجوه أصحاب الاذخرات العقارية وأصحاب الاذخرات الثانية زي الذهب والفضة والاحجار الكريمة يعني لو في حد فيكم عنده قرشين يمشي يشري بيهم حاجة خير واهم اضرار حالات الاقتصاد اللي زي هده زيادة في البطالة و إنخفاض في مستوى المعيشة وإعادة ترتيب طبقات المجتمع

والسؤال المهم والضروري معرفة الأجابة عليه هل أمانة او وزارة الاقتصاد الليبية ماشية بخطة من اجل تحسين الوضع الاقتصادي وتحسين الحالة الاقتصادية للمواطن الليبي؟؟؟؟؟

إن شاء الله من عند ربي خير